Sau baras ho gaye..

Ab sau baras ho gaye..

Ye din nahi nikla,
Ye chand nahi dhala,
Ye baadal nahi barse,
Hum nikle nahi ghar se,
Ab bhi kaid rahe hai,
Taare kuraid rahe hai,
Toote sapne jude nahi,
Aankho se bandhe nahi,

Ab sau baras ho gaye..

Kuch likhe hue dil ki,
Sooni si jo mehfil thi,
Khaali diwaro ki aawaz,
Unchi minaaro ki pukaar,
Tham gayi chalte chalte,
Waqt ek ho gaya pighal ke,
Kuch taraane ansune rahe,
Bol tumhare kaano me mere,

Ab sau baras ho gaye..

Aaj bhi yaad aate hai,
Barbaad kar jaate hai,
Khayal do chaar hi theek,
Bimaar sa kar jaate hai,
Khush hone ka darr hai,
Dua har beasar hai,
Dhundla sa aks bhi,
Khamosh har shaks bhi,

Ab sau baras ho gaye..

Ek hi dhun sun rahe jo,
Waqt me tham jaye wo,
Qatra bheega imaan ka,
Behta hai aaj lahu sa,
Aankho me dhuan chupa,
Dil me hai jala aag sa,
Mere wajood ki chita,
Thandi kabhi hui kaha,

Ab sau baras ho gaye..

Love, Aslam (:
Dated: 16th November, 2013

Note: 
I wish I could explain how this poem is about a person who has been dead for 100 years now..crazy thought, crazy night, crazy lines!! - Aslam (:

Aye Mann Mauji..(Song Lyrics)

Benishan..teri kahani hai..
Khamoshiyon ki zubaani hai..
Benishan..teri kahani hai..
Khamoshiyon ki zubaani hai..

Jo basa tere andar, usse kahan dhundega tu..

Kyu tadapta phire jogi,
Kyu behekta phire jogi,
Manzil teri hai kahan,
Kahan tu hai jaa raha..aye mann mauji..

Bichchad jaaye saari raate,
Aankhen ye takti rehti hai
Toote khwabo se jod kar
Taaro se baate karti hai

Tera rasta hai, meri manzil
Tanha manzar hai, sooni mehfil
Tera rasta hai, meri manzil
Tanha mazar hai, sooni mehfil

Mann ki na sun, mann to hai baanwra re..

Kyu tadapta phire jogi,
Kyu bhatakta phire jogi,
Manzil teri hai kahan,
Kahan tu hai jaa raha..aye mann mauji..

Har dagar ke har mod par

Tujhe socha hai maine

Dil ke har chupe kone me

Tujhe dhunda hai maine

Kya khuda hai, kya kaafir
Basa mujhi me tu aakhir

Kya khuda hai, kya kaafir
Basa mujhi me tu aakhir

Tu noor ki dua hai, tu nahi to kya hai..

Kyu tadapta phire jogi tu,
Kyu bikharta phire jogi tu,
Jhoothi.. teri ye kahani hai
Bas khwahishon ki zubaani hai
Manzil teri hai ye yahaan,
Aa bhi jaa zara..aye mann mauji..

Love, Aslam (:
Dated 7th May, 2013

Fursat e zindagi...

Phir nayi shaam se zindagi jalaa raha hu main,
Dhuen me har khwab ko udaa raha hu main,
Khush hu main jaisa bhi ghum baras pade to,
Raakh ban ke behta jaa raha hu main..

Waqt ko thaam liya, mutthi meri na khole koi,
Fursat ko ek naya paath pada raha hu main,
Dheeme dheeme ghol ke tanhai pee chuka hu,
Khud hi naye jaam banata jaa raha hu main..

Qatre qatre me ek jhoot chupa hai udaasi ka,
Pee pee kar har jhoot ko apna raha hu main,
Honton se fir jo naghme nikle wo sachchai hai,
Behoshi me bhi nekiyan kamaa raha hu main..

Phir nayi subah me daud lagi hai deewano ki,
Dhuen me udaye khwab samet_ta jaa raha hu main,
Phir khule haathon se waqt beh chala jaa raha,
Ab kisi kone me fir ek glass dhund raha hu main,

Zindagi ki is bheed me kaun bhala zinda bacha hai,
Isliye mar mar ke jashn manata jaa raha hu main..

Love, Aslam (:
Dated: 31st July, 2013

PS: I wasn't drunk when I wrote this :P

Qatl-e-aam

Main kaise kahu aaj ye zubaan kyu chup hai,
Meri aarzuon ko saari pareshan kar de,
Chahe na chahe koi mera jahan hai tu,
Maathe ki saari lakiron ko benishan kar de..

Parde me rehne de ye jism sar se paon tak,
Dil ke taale ki chaabi mere naam kar de,
Ho lakh mannatein nakamyab tujhe paane ki,
Main tujhe mil jaun ye dua bayaan kar de..

Dil ke khayalon ke aaine me jo bharam sa hai,
Aks ye tera toot na jaye ye ehteraam kar de,
Dar-ba-dar main teri ibadatein kar chala hoon,
Jo ho sake to ik baar has ke salaam kar de..

Main bhool chuka hu apni saari hasti ko jaise,
Tu zindagi me aa ke mujhpe ye ehsaan kar de,
Na jaane kab ye dil hum tujhpe haar chuke hai,
Bin maange tu khudko mujhpe qurbaan kar de..

Aaj jaana tadapte hue logo ke dard ko aakhir,
Meri bechaini me koi aaram ka intezam kar de,
Mohobbat ko teri seene se laga ke jiya karte the,
Tu bhi kabhi chahaton ka apni elaan kar de..

Tujh sang bitaun ye adhoori si zindagi meri,
Apne aap ko mere hawale subah shaam kar de,
Na haasil hoga kuch aise rooth kar dekh lena,
Muskurake mujhe yun hi tu qatl-e-aam kar de..

Luv, Aslam (:
Dated :  7th May 2013

Shikaayate itni hai jo bas dil jaanta hai..

Shikaayate itni hai jo bas dil janta hai,
Shikwe gile mit jaayenge sabhi,
Duur duur rehke satana aadat ho jaise,
Paas aane ke kaise bahane de koi..

Lapata se chal rahe dhund lo tum mujhe,
De do apne pehlu me aasra kabhi,
Yaaden samet ke manzil ki talash me,
Raahi akele ko kya pehchan de koi,

Ik khushi teri jaise nadiyaa sagar se mile,
Thehri hui zindagi ki kya misaal de koi,
Lehron se beh ke dil me jo utar jao tum,
Toofano ko batao kaise thaam le koi..

Luv, Aslam (:
Dated : 21st April 2013

Nasha

Main dekhta hu jidhar wo bhi apna rukh fer lete hai,
Kuch aise wo mere saaye se apna mann jod lete hai..
Koi kasar nahi rakhte wo mera dil jalane me kabhi,
Apni dilkash muskurahat se mujhe apna bana lete hai..
Waade hazaar apne zubaan se bayaan kar jaate hai,
Tod ke dil mera wo bhi duur khade muskurate hai,
Honton se chup reh kar bhi na jaane kaise,
Wo dil ki hazaaron baate bayaan kar jaate hai,
Aate hai khayalon me to fir jaane ka naam nahi lete,
Kore mann pe jaise ik nayi ghazal de jaate hai,
Main unke nashe me jhoomta raha hu barso se,
Kuch aise wo mujh pe apna asar chodh jaate hai..

Luv, Aslam (:
Dated : 1st April 2013

Tere laut aane ka intezar..

Shayad teri ek muskurahat bacha le mujhe,
Ya tu apne ek jhoot se barbad kar de mujhe..
Tere haathon se ban jaun ye khwaish hai,
Tere kadmon tale na mar jaun ye darr hai..

Mera kuch nahi yahan, tere siwa koi nahi hai,
Ye tanhai mere dil me ghar kar jaye ye darr hai..
Ik mumkin si kahani nahi ye meri zindagi hai,
Kuch hasil kiye bina mar jaun ye darr hai..

Jo bhi tukde jode hai bikharte rehte hai yun,
Kahin khud tukdo me na bat jaun ye darr hai..
Hausla bhi kho chuka, himmatein bhi toot chuki,
Ye waqt bhi dhoka de jayega ye darr hai..

Tinka tinka sambhal rakha hai tere ehsaas ka,
Teri yaadon me hi na bikhar jaun ye darr hai..
Na rok sake in ashko ko, na rok paye tujhe,
Tere laut aane ke intezar me kidhar jaye ye darr hai..

Luv, Aslam (:
Dated : 10th March, 2013

Main kaun hu..

Main kaun hoon..

Ghira hua hoon apne hi lahu se,
Apne hi dard ko baha diya maine,
Kyu mujh me hazaro khwab toote hai,
Jo silsila ye khatm ho to jaan lu,
Main kaun hu, main kaun hu..

Kya ehsas hota hai kya pyar hota hai,
Bhoole bisre se panno me likh chuka,
Usse bhi gehre ye mere ghaav hai,
Usse kai gehri ye meri chot hai.
Jo mujhe ye yaad dilati hai har lamha,
Mera wajood main khud dhund raha,
Kahan main jaa raha hu,
Kya main paa gaya hu aur kya main kho chala hu,
Main kaun hu, main kaun hu..

Koi mujhe ye keh kar gale laga jata hai,
Koi mujhe wo keh kar daga de jata hai,
Main ulajh gaya hu apne hi sawalo me,
Doob gaya hu bikhre khayalo me,
Na koi jawab deta hai, na koi raah bata pata hai,
Jo bhi aata hai, mera aks mita kar chala jata hai,
Kuch bheege lamhe main jodta reh jata hu,
Na kuch theherta hai, na main kuch sama pata hu,
Main kaun hu, main kaun hu..

Jo haal na jane wo katil mera hai kahan,
Hosh sambhale main jaun to jaun kahan,
Meri yaado ki laashen bichhi dekhi hai maine,
Barbad apna jahan main lutaun to lutaun kahan,
Band hi ho jaye ye saanse to puch lu,
Mujhe apno ne maara ya gairon ne maat di,
Dushman mere ho ya dost mere, main tujh me bhi apna ek shaks dhundta hu,
Ajnabi main apne liye ban gaya, tere liye kaun hu,
Main kaun hu, main kaun hu..

Ek waar kahin se mere mann me fir chalaya hai,
Jo ujdi hui hai yaadein unhe fir kisine jalaya hai,
Cheekh rahi meri ruuh mujhe pukar rahi hai,
Chodh chalu ye jeene ki hasrat ye keh rahi hai,
Bewajah kyu tooti tasweere rangeen si lagne lag gayi hai,
Band darwazo me kyun main zindagi tatol_ta reh jata hu,
Main kaun hu, main kaun hu..

Luv, Aslam (:
Dated : 27th Feb, 2013

Main teri ore chal pada hoon..

Main teri ore chal pada hoon..

Apne saare ghum bhula ke,
Tujhse saare vaade nibhane,
Sab se juda ho kar aaj yun,
Main teri ore chal pada hoon..

Khwahishon ko apni bhula kar,
Raaton ke chirag dil me jala kar,
Roshan karne mera jahan tujhse,
Main teri ore chal pada hoon..

Mere sang kahin duur le chalu,
Bekhabar har ghum ho jahan,
Tere kadmon se kadam milane,
Main teri ore chal pada hoon..

Saanso me meri, teri mehek si hai,
Itne kareeb tujhko pata hoon apne,
Teri ehsaason ko haqiqat banane,
Main teri ore chal pada hoon..

Tere labon ko chukar aise kuch,
Unki main nami chura lunga,
Fir hokar rubaru teri chahon me,
Maine teri ore chal pada hoon..

Luv, Aslam (:
Dated : 29th December 2012