Shuruat :)

Mere wajood ki sabse haseen kahani jo tujhse shuru hai,
Uske liye kuch alfaaz dhund raha hu, ek aawaz dhund raha hu..
Tere naam ke siwa shayad mujhe aaj kuch bhi pata nahi,
Main apne haathon ki lakeeron me tera nishan dhund raha hu..

Duur hai aaj tu mujhse par dil ke kareeb hai kuch aise,
Har shaks me aaj kal main teri pehchan dhund raha hu..
Tanhaiyon me bhi jaise mere rubaru tu hai har peher,
Khamosh hawaon me bhi main teri muskan dhund raha hu..

Tere honton se apne naam ko sunne ki aarzu hai dil ko,
Teri muskurati aankhon me main apna aks dhund raha hu..
Tanha sa jo aalam raha hai meri zindagi ka aaj tak,
Tujhme main thodi wafa aur thoda sa aitbaar dhund raha hu..

Meri talash tujh se shuru aur tujh par hi khatam hai,
Ek nayi zindagi ki tujhme main shuruat dhund raha hu..
Adhoori meri kahani tere rang me rangne ko tayyar hai,
Tere sang bheeg jaun wo haseen barsaat dhund raha hu..

Khushi tu meri, aaj se main teri wajah muskurane ki,
Tujhse main pyar jataane ke bahaane dhund raha hu..

Ek waada hai mera tu mujhse aaj ye sun lena, 
Tanha main tujhe kabhi hone nahi dunga..
Haathon se apne saja ke rakhunga teri hasi ko, 
Dekhna main tujhe kabhi rone nahi dunga!!

Happily Engaged!!

Love, Aslam (:
Dated: 27th December 2014

Haseen Khawahishein.. ;)

Pighal rahi hai chandni aaj armaano ke bistar par,

Hosh usse kuch nahi hai aaj ki haseen raat ka,

Hona hai jo aaj ho jaane do keh rahi hai bas,

Kal subah mit jayega nishaan iss baat ka..

Haule haule samet lo baahon me aaj mat jaane do,

Honthon ko apne duba do lahu ke rangon me,

Nishan apne chodh jao takiye par mere sirhane me,

Bichha do satrangi chaadar badan par aasmano ke..

Aaj yun hoga sitaare toot jayenge sharma kar,

Dooba hua sagar machlega neele gagan tale,

Thak ke soye hai raat bhar hai ye badan toote hue,

Suraj se bhi keh diya hai ki subah jaldi na nikle..

Sawere kise pata hum kahan tum kahan kho jaye,

Iss raat ki siyahi se mere badan ko aaj yun rang daalo,

Phir gaal pe giri lat hata kar choom lo mujhe,

Madhoshi bhari iss raat ko meri zindagi bana daalo..

Love, Aslam (:

Dated: 15th April, 2014

Kehkashaan

Lafz kahan jo bayaan kar sake tum kya ho,
Muskurate hue aabshaar* si rida* ho..
Aankho se yun shararat chalakti hai tumhare,
Nanhi si pari ho tum, tum kehkashaan* ho..

Aawaz me tumhari ek alag sa gehra nasha hai,
Sunta hai har farishta jab tu gungunati hai..
Chalta hai ajab sa silsila teri peshani* par,
Lehrati wo zulf ki ghata jab tujhe satati hai..

Adaaon se kaun bolo bach paaya hai tumhari,
Baaton me koi kahan kabhi jeet paaye tumse..
Ziddi bhi kam nahi tum kisi se jaanta hoon,
Dua hai kisi ki nazar na lag jaaye tumhe..

Par dil me apne baandhe rakhti ho baatein,
Honton pe bas jhooti khili rehti hai hasi..
Kabhi khamoshi me dhadkan padh paun jab,
Jaan lunga kya baat hai tum me chupi..

Ek arsa hua hai tumko apne rubaru paaye,
Kabhi ek pal ko apna maan kar keh do tum..
Saare ghum jo gehre samaye rakhte ho khud me,
Kabhi yun hi gale laga kar sab keh do tum..

Khamoshi bhari in aankhon me bas sukoon milega,
Tumhari khushi me saara jahaan aabaad ho jayega..
Tum chaho to har kamyabi tumhare kadam chumegi,
Dil se muskuraoge jab tab ye "Psycho"* zaroor yaad aayega!

*aabshar = waterfall
*rida = literally means ' the fact of being pleased or contented'
*kehkashan = a "Highest place" so high to say as a "Galaxy" or a Star or "Universe"
*peshani = forehead
*Psycho = Aslam :P

Love, Aslam (:
Dated : 19/04/2014

Roothi hui raat..

Ye koshish jo ki hai sitaaron ne chand ko paane ki,
Raat roothi hai yun mayusi ban kar aasmanon ki,
Subah ka suraj bhi jaise zidd me hai ghar jalaane ki,
Duniya intezaar me bechain hai naya din sajaane ki..

Kab na jaane pighlega chand se saja ye samaa,
Toot kar sitaaron se mukammal hogi ye subah,
Baadal raasta bhatak jaane ki shikayat kar rahe,
Panchhi udaan bharne ki shinakht me hai ladd rahe..

Bahot si aankhon me neendon ka tyohar ruka hai,
Khwabon ki chandni me chehra khuda ka chupa hai,
Zindagi jaise sabhi ki ruki hai roshni ke intezaar me,
Mohobbat ne dekho nikamma kiya hai sabhi ko sansaar me!!

Love, Aslam (:
Dated: 22nd February, 2014

Author's Note:

This poem depicts the chaos that has been caused by the 

feeling of love of the stars towards the moon..There conflict

is the reason why the night sky is sad and time has stood 

still.. :)

Jeene laga hu..

Aaj kuch aisa gumaan hone laga hai,
Tanha mera mann khush hone laga hai,
Khamoshi ko tod kar, lafz suhane bun kar,
Dil mera jaise mujhse hi kuch kehne laga hai..

Jo toot chuke wo taaron ko bhula kar,
Ek chaand ka sarmaya hone laga hai,
Tasweer khayalon ki ab ho chali ho rangeen jaise,
Khwabon me ehsaas haqeeqat ka hone laga hai..

Usme mujhe mera aks dikhne laga iss qadar,
Main apni parchaiyo me use dhundta chala hu,
Wo har tarah se mujhe padh leti hai jaane kaise,
Main kuch kuch ab hairan sa rehne laga hu..

Mere dil ki band kitaab ko ab jaise main khud,
Uske honton ki siyahi se sunne laga hu,
Phir bhi ek khamoshi dil me liye har roz,
Main jee bhar k hasne laga hu, jeene laga hu..

Love, Aslam (:
Dated : 1st November, 2013

Wo pehli mulaqat (6 November ki raat)

Wo pehli mulakat ka ehsaas main nahi bhulunga,
Wo 6 November ki raat main nahi bhulunga..

Intezar karta main uss khushi ka jo aa rahi thi,
Dabe paanv jaisi kuch kuch sharma rahi thi,
Har chehre pe nazar dhund rahi thi ussi ko,
Kya jaane wo kaise bheed me mujhe pehchan payegi,
Fir tasweer wo jaise muskura kar jee utthi ho,
Jab dekha use to laga duniya tham si gayi ho..

Wo pehli muskurahat ka andaaz main nahi bhulunga,
Wo 6 November ki raat main nahi bhulunga..

Thand si raat me kapkapati si gudiya jaise wo,
Mujhe dekh leti kaise aaine me muskurate hue,
Uddti hui zulfen uski, Hasi uski dil me goonjti,
Main soch raha hu abhi bhi usko bada itraate hue,
Ehsaas hi jaise, thode sharmate, thode ghabrate haaye,
Wo pehli mulakat ka asar chahun zindagi bhar reh jaye..

Wo bikhri zulfo se jhaankti aankhe main nahi bhulunga,
Wo 6 November ki raat main nahi bhulunga..

Iss raat ki subah main chahu kabhi na ho,
Dua jaise koi mil kar bhi haasil na ho,
Adhuri mulakat thi, adhure aaj mere alfaaz hai
Jaise main uss lamhe me jee raha hu abhi..
Raat beh chali hai par main ruk sa gaya hu,
Us lamhe se jab muskura ke wo khushi mere paas aayi,
Us lamhe tak jab wo muskura kar chali gayi..

Un haseen palon ki maasoomiyat main nahi bhulunga,
Wo 6 November ki raat main nahi bhulunga..

Love, Aslam (:
Dated : 9th November, 2013

:)

Maine laakh gunaah kiye ho chaahe,

Tu meri wo ek neki jaise lagti hai,

Jo meri begunah aankhon ko chuu kar,

Mujhe deedar-e-khuda karwati hai..

Meri bandagi ki tu jaise murat ban jaye,

Paa kar tujhe mera khuda mil jaye,

Dua bhi tujhse karu ki tu meri ho,

Phir mujh me hi tu kahin mujhe mil jaye..

Love, Aslam (:

Dated : 5th December, 2013

Dil ki dooriyan..

Ek hissa tera jo ab bhi mujh me kahin baaki hai,
Teri mehek ka asar jo bana raha mujhe saaki hai,
Boond boond piye jaa raha hu ghum yun apna,
Honthon se siye jaa raha hu behta hua har lamha..

Laut aane do mujhe fir unhi guftugu ke parcho pe,

Doob jaane do in khamosh si aankhon ke toofano me..

Ahista ahista kadam badhana hi hai rivaaj zindagi ka kyun?
Lamba sa safar hoga chand yun to hai hi abhi aadha kyun?

Pukarti hai meri rooh tere jism ki panaahon ko,
In hatheliyon ki adhuri si kuch lakeeron ko
tum poora kar do, de do zindagi ki dua mujhko,
Bebasi aur tanhai se ab to kar do riha mujhko..

Misaal ban jane do jo qayamat tak log yaad rakhe,
Tera nasha ab mere sar chadh kar bol raha hai,

Khwaabon se nikal kar dekho ye haqeeqat ka aaghaz hai,
Dil ki dooriya tay kar lete hai, chand to fir bhi paas hai..

Love, Aslam (:

Dated : 16th February, 2014

Nanha Sa Suraj..

Nanha sa suraj har subah hi aksar
Kya neend se jaagne se darrta hoga?
Angadayi leta hua bistar par apne
Fir 5 minute sone ki zidd karta hoga??

Har raat aankhe aasmaan par lagaye wo
Kya taaron ki roshni me jagta hoga?
Chupke se chand se milne ko kya
Thandi Thandi aahen bharta hoga??

Jab garajte hai badal aur bijliyan chamakti hai
Kya wo seham kar maa ke aanchal se lipatta hoga?
Toote koi taara jab aasmanon me wo
Kya aankhen moond kar mannate karta hoga??

Love, Aslam (:
Dated : 11th February, 2014

Dhanak..

Behte waqt ko rok kar maine aaj jaise
Aane wale kal se chun kar riha kiya hai,
Odh kar ek khayal ki chaadar raat bhar
Maine saare panno ko lahu luhan kiya hai

Jaise likhi ho daastan kisi samandar ki
Udte parindo ki aawaz se farmaan liya hai 
Sailaab baanwre kaise uthte hai dilo me
Kaise adhoore sapno ko qurbaan kiya hai

Dil ki siyahi sukhi padne lagi jab jab
Baadalo ki ghataon se tab ehsaan liya hai
Likhi hai ghazal fir ruthe hue dhanak ki
Rang birangi muskurahaton ko aazad kiya hai!

Love, Aslam (:
Dated : 25th November, 2013