Aa bhi jaa zaraa..

Khoyi khoyi zindagi me tu kahin gum hai,

Mujh me tu kyun fir bhi rehti har dum hai,

Puchte hai mere raat aur din tujhe,

Kab lautegi wo subah dar pe mere,

Aa bhi jaa zaraa,

Aaa bhi jaa zaraa..

Haathon me ab bhi tera ehsaas baaki hai,

Dil me kahin kuch bheege alfaaz baaki hai,

Main toot ke bikhra hoon teri raahon me,

Tu bhi kahin kabhi meri chaahon me,

Aa bhi jaa zaraa,

Aaa bhi jaa zaraa..

Barbadiyan bhi hai, Khamoshiyan bhi hai,

Dil ki hazaron gustakhiyan bhi hai,

Aansuon ke raaste har khwaab beh gaya hai,

Parchaiyon se guftgu karte thak gaya hai,

Aa bhi jaa zaraa,

Aaa bhi jaa zaraa..

Bheed me bhi kyun dil tanhai ko dhundta hai,

Meri har ik khushi mein tu hi to basaa hai,

Mujhe fir se tu kahin se koi awaaz de de,

Meri viraan ghazal ko koi saaz de de,

Aa bhi jaa zaraa,

Aaa bhi jaa zaraa..

Ik baar jo mil jaye to gale laga lunga main,

Tujhko apni saanson me samaa lunga main,

Aankhon se bayaan karunga apni mohabbat ko yun,

Ki mom si pighal jayegi meri baahon me tu,

Mumkin nahi hai, jeena yun tanha,

Ik aakhri iltija, ik aakhri dafaa,

Aa bhi jaa zaraa,

Aaa bhi jaa zaraa..

Luv, Aslam (:

Dated : 15th November, 2012

Untitled

Khwabon ki boundary se nikal ke,

Koi stupid sa bahana kar ke,

Wo tumhari copyright wali smile maar ke,

Aaj yun hi hold me close karne aajao na..

Kaise wait karu meri heartbeat tera,

Jal sa gaya hai brain ka circuit mera,

Tum aao to night me roshni ho jaye,

Kabhi yun hi dil ka disco light jalao na.. 

Bas tere liye ye time full stop ho gaya hai,

Tera wait karte karte late ho gaya hai,

Pucho mere dil se kitna miss kar chuka,

Meri search me tum bhi koi warrant chalao na..

Har direction me teri tasweer si dikh rahi,

Tum bhi apne heart me mera collage banao na

Aaj wo hi armaano se mujhe pukaro tum,

Aur fir khud daud ke mere paas chale aao na..

Luv, Aslam (:

Dated : 6th October, 2012

Aaj main haal e dil sunau bhi to kya..

Aaj main dhool lapet kar so jaoon bhi to kya,

Aaj main tanha fanaa ho jaoon bhi to kya,

Kal jo mere saath the jugnu sab jal chuke hai,

Aaj roshan karne duniya gar khud ko jalaun bhi to kya..

Kuch aashiyane meri zindagi se viraan ho chale hai,

Aaj main khali diwaron se batiyaun bhi to kya,

Aarzoo jo meri kabhi bayaan ho na saki kyun,

Aaj unhi khwahishon ke daldal se khud ko bachaun bhi to kya..

Tadapne do ke main shayad ek aakhri dafaa use pukar loon,

Aaj yun hi sar e aam main bewafa kehlaun bhi to kya,

Mere khushi ke pal saare bechaini me beh chale hai,

Aaj main teri ibadat me sukoon ke do pal bitaun bhi to kya..

Luv, Aslam (:

Dated : 22th July, 2012

Boond..

Ek uljhi si raat ka ek ankaha sa sawaal suno,
Kyun ye taare toot jaate hai batao,
Chand mamu ki hatheliyon se aksar,
Kyun ye chooth jaate hai batao,
Kahan chale jaate hai saath chodh kar,
Kab laut aayenge ghar ye batao,

Bholi si aankhe nazre jamaye baithi hai,
Ye kaali raat mere sang kyu jag rahi ye batao,
Natkhat si wo payal ne bhi chuppi kyu li hai,
Naino se phir bhi teekha bole kaise ye batao,
Nanhe se uske har kadam se wakif hai hum,
Khushi dabe paon kahan jaa rahi ye batao,
Barsaton wale badal ne hai dastak di shayad,
Bheeg na jaye kaise aankho ke sagar ye batao,

Tanha sa koi toofan sa chalta hai mann me,
Kaise raah e manzil chunu mujhe ye batao,
Wo ghadi thi jab mukammal lagta tha jahaan mera,
Ab sooni mehfil sa kyu lagta hai ye batao,
Ek sagar si gehri meri zindagi tanha ruki hai,
Kis boond me main tum sang tham jaoon ye batao..

Luv, Aslam (:
Dated : 21st of July, 2012

Panchi sa hoon main..

Meelon duur udd chala wo panchi hoon main,
Ghar laut jaun kaise ye khabar nahi,
Khaali aasman hi aashiyan lage hai mera,
Badalo ke siwa mera koi bistar nahi..

Bas ruku kahan ye bhi nai pata mujhe,
Aur kitna aage badhna hai mujhe,
Itne saare sawaal mann me pal rahe,
Dil me apne armaan liye chal rahe,
In nazuk pankho se dua karta rehta hoon,
Kabhi jo rab mile ye aksar kehta rehta hoon,
Kyu chodh chale ho mujhe yu bewajah,
Kya paana hai maine duniya me yahaan,
Teri panahon me jannat hai agar to kyun,
Mujhe muddaton se tu bhataka raha yahaan..

Har subah pe nazar lagaye baithe hai,
Har shaam ye aas lagaye baithe hai,
Kal tu mujhko apne paas bula lega,
Seene se mujhko tu laga lega,

"Mere bande tu itna kyu bekhabar hai mujhse,
Meri saari khudayi mehki hai tujhse,
Tu ek dafaa jab apne par lehrata hai,
Ye wadiyo me nikhar chadh jata hai,
Teri har ek khushi ka humne hisaab rakha hai,
Tere har sawalo ka humne jawaab rakha hai,
Tu na soch itna, tu na ruk kabhi kahin,
Tera hi hai aasmaan tujhse hi hai zameen,
Jab jhuke tu sajde me ye ikraar karta hoon,
Main to tujhpe apni saari qaynat nisaar karta hoon!!"

Luv, Aslam (:
Dated : 06th April, 2012

Tum ho..

Kehne ko to bahot si baatein hai is dil me,
Mukhtasar lafzon me meri aakhri khwaish tum ho..

Batao kis rab se tumhe paane ki dua karein,
Hasraton se bhare dil ki aakhri farmaish tum ho..

Kiski panaho me dhunde tujhe ye baawra mann,
Tanha meri raaton ki aakhri baarish tum ho..

Bheega ye aashiyaan mera lekar chala hu,
Kahin aasra paane ki aakhri gunjaish tum ho..

Mere maathe pe likhe lafz jee uthe hai,
Meri kismat ke shehar ki aakhri numaish tum ho..

Bayan kaise karu wo rahatein teri chahat ki,
Mukhtasar lamhon ki meri aakhri khwaish tum ho..

Luv, Aslam (:
Dated : 09th June 2012

Main Chalta Hu..

Mera ho chuka safar khatm yahan,

Ab ijazat de do, main chalta hu..

Tum apne raaste chalo,

Main apne raaste chalunga,

Ye sahara hata do ab,

Ye nazdeekiyan mita do ab,

Tay karne ja raha hu manzil nayi,

Mujhe ijazat de do, main chalta hu..

Ek waqt tum yaad karna,

Ek shaks ne hasaya tha tumhe,

Saari duniya ko chodh kar,

Apnaya tha sirf tumhe,

Usi chahat ka aaj waasta le lo,

Aur ijazat de do, main chalta hu..

Tumhari har ik hasi ko maine,

Apni aankhon me basaya hai,

Tere har dard ko bhi khushi se,

Apne seene se lagaya hai,

Har lamhe ki guzaarish ab sun lo,

Tum ijazat de do, main chalta hu..

Meri kami ko mehsus karna,

Mujhe apne ateet me dhunda karna,

Main wahi milunga tumhe har pal,

Apne khayalo me mujhe zinda rakhna,

Ye zindagi aage chal padi hai,

Mujhe ijazat de do, main chalta hu..

Is daud me peeche na reh jaun,

Waqt ke dal dal me na beh jaun,

Kabhi tanhai me mera intezar karna,

Kabhi bheed me mujhe dhunda karna,

Khuda ne chaha to fir milenge chalo,

Mera ho chuka safar khatm yahan,

Ab ijazat de do, main chalta hu..

Luv, Aslam (:

Dated : 15/05/2012

Aksar..

Aksar mere dil se ek aawaz nikalti hai,

Jaane kyun is aag mein zindagi jalti hai?!

Chalta rehta hoon main phir bhi ye zindagi,

Kyun is jalte hue mom* ki tarah pighalti hai?!

Rokna chahoon kisi pal ko main to,

Jaane kyun itni raftaar se chalti hai?!

Tanhaiyon me waqt guzar jaane ki dua karu to,

Phir ye raat kyun nahi dhalti hai?!

Saawan ke aate hi gulshan khil uthte hai,

Phir mere pyaar ki kali kyun nahi khilti hai?!

Pyaar ki gehraiyon ko chhoona chahoon to phir,

Mujhse ye zindagi ki kashti kyun nahi sambhalti hai?!

*mom = wax

Luv, Aslam (:

Kehne to de..

Tu to rehti hai mere dil me hamesha,

Zaraa si jagah tere dil me bhi to rehne de..

Aankhon se kaha hai baar baar ye maine,

Mujhe tujhse pyaar hai ek baar kaano me to kehne de..

Saanse chalti hai tera naam lekar har dum,

Jaate jaate ek baar tujhe mehsus to kar lene de..

Jeena mujhe gawaara nahi hai khamoshi me,

Mujhe tujhse pyaar hai honton se chhukar to kehne de..

Tere kadmon me do jahaan dekhe hai maine,

Tere dil ke jahaan me ik dafa to bas lene de..

Tu mera maalik hai, tu mera khuda hai,

Mujhe tujhse pyaar hai ek zindagi to ye jap lene de..

Teri aankhon me pyaar ka sagar to dekha maine,

Ab zaraa is nashe me thoda sa to beh lene de..

Bas ek lamha hi kaafi hai tujhpe jaan lutane ko,

Mujhe tujhse pyaar hai marne se pehle keh lene de..

Tere maathe pe likhi hai kismat meri,

In panno ko ek baar aur padh lene de..

Teri muskurahat pe meri saari khushi qurbaan karu,

Bas mujhe tujhse pyaar hai ek baar kehne to de..

Kehne to de!!

Luv, Aslam (:

Yeh Pal..

Maine naa jaana kab waqt guzarta gaya,

Pyaar ka yeh pal kabhi thama hi nahi..

Uski aankhon se kahi baaton me hi sahi,

Uski muskurahat ka pal kabhi thama hi nahi..

Isharon me sikhaya jeene ka andaaz usne,

Phir ye zindagi kal pal kabhi thama hi nahi..

Mann ke bhanwar me uska hi basera hai,

Beh jaane ka yeh pal kabhi thama hi nahi..

Paani ki boondon me ghul jaati hai wo,

Us barsaat ka pal kabhi thama hi nahi..

Ek kapkapi se mehsus hui thi kabhi,

Use chhune ka pal phir kabhi thama hi nahi..

Uski aahat ke intezaar me soye nahi hum,

Wo bechaini ka pal kabhi thama hi nahi..

Shaam tak aakhen dhundti rahi usko,

Phir ye tanhai ka pal kabhi thama hi nahi..!!

Luv, Aslam (:

Doorie

Dil ke kareeb rahi hai wo,

usse ab duur jaana aasaan nahi..

Mere khayalon me sajaya hai usko,

yun dil ko jalaana aasaan nahi..

Aansu tapak ke ye hi duhayii dete hai,

is barsaat me bheeg jaana aasaan nahi..

Kaise tanha guzri hai zindagi,

ye bataana aasaan nahi..

Kaise jude hai sheeshe ke tukde,

ye samjhana aasaan nahi..

Kyun chalta raha hoon talash me kisiki,

palko pe jab kisiko bithaana aasaan nahi..

Wo meri taqdeer si ban gayi ab,

is baat se mukar jaana aasaan nahi..

Adhura sa hu main uske bina,

ab meri kahani mukammal kar paana aasaan nahi..

Aankhein karti hai jo raaz bayaan,

us kahani ko padh paana aasaan nahi..

Jeena nahi akele bas itni si khwaish hai,

ab usko paaye bina mar jaana aasaan nahi!!

Luv, Aslam (:

Dated : Long Long Time Ago! 

Ik Aarzoo..

Bahaar mein phir khilne ko jee chahta hai..

Aaj yun hi kuch likhne ko jee chahta hai..

Aankhon mein basaya hai humne har pal use,

Aaj phir usse nazarein milane ko jee chahta hai..

Kyun chal pade us rehguzar par har sehar,

Jab shehron me ghar basane ko jee chahta hai..

Sukhe patton ki tarah hamari nazarein bol padi,

Ki aaj phir daaman bhigone ko jee chahta hai..

Pyar mein deewane ho gaye hum is kadar,

Ab is diwangi mein beh jaane ko jee chahta hai..

Unki surat mein hai hi itna noor ki,

Aaj dil ka har chirag jalaane ko jee chahta hai..

Uske honton se har sargam sajaa dene..

Uski aankhon se har gham ko chura lene..

Uske har kadam se kadam milane ko jee chahta hai..

Zindagi bhar ye saath nibhane ko jee chahta hai..

Dil mein uski tasweer kar ke roshan,

Aaj yun hi kuch likhne ko jee chahta hai..

Luv, Aslam (:

Dated : Long long time back!!

Beh chala hu main..

Beh chala hu phir aasman me,

Phir kisi parinde se mohabat hui hai,

Badalo ki gehraiyon ko chhune,

Lehron pe girne sambhalne,

Kinaro ki talash me,

Beh chala hu phir aasman me,

Phir kisi parinde ki aadat hui hai..

Toofano me uchalte hue bhi,

Kashti dubne nahi di kabhi,

Apne paro par aasra diya hai,

Unchi udaano ka hausla diya hai,

Khwabon ke unche pahadon se,

Beh chala hu phir aasman me,

Phir kisi parinde se mohobat hui hai..

Barsat me bheegi boondon jaise,

Aankhon ke do moti tere,

Jab uthe to gulistan ho jaye,

Jo jhuke to shaam ho jaye,

Tere hasi ke jharno se fut kar,

Beh chala hu fir aasman me,

Phir kisi parinde se mohobat hui hai..

Chand taaron se aage udd jaunga,

Hoke uski chahat pe sawaar,

Is jahaan ko paa jaunga,

Meri jannat meri aarzoo hai bekarar,

Haasil karne ye mutthi bhar jahaan,

Beh chala hu fir aasman me,

Phir kisi parinde se mohobat hui hai..

Luv, Aslam (:

Dated 11/02/2012

Ek junoon..

Ajnabi hi sahi, meri manzil se mujhe pyaar hai,

Ek junoon hi sahi, paana use is baar hai,

Zidd aur nahi, bas kashti paar lag jaye,

Khoye wajood ko, ek nayi hasti mil jaye,

Jo chalu main, to na thakna hai mujhe,

Ab aur nahi kahin rukna hai mujhe,

Ik arsa beet gaya us khushi ko gale lagaye,

Kab tak yun auron se aas lagaye,

Ye meri kismat ko mujhe hi jagana hoga,

Mod badle hawaon ka isse pehle, kuch kar dikhana hoga..

Luv, Aslam (:

Dated 10/03/2012

Tera Mera Pyaar..

Ye mehek teri yun paas bulati hai,
Meethi si mushkil me daal jati hai,
Tujhe bahon me bhar kaise na loon,
Tujhe thoda pyaar main kar kaise na loon,
Sochta hu ruk jaye ye pal jab tu thaame mujhe,
Bin matlab meri baaton par bhi hasa de mujhe,
Leke chale mujhe kahin door jahan se suraj nikle,
Bas tu gungunaye aur ye panchi machle,
Niche dariya ho aur upar ho badal ghane,
Aur meelon duur tak jahan zameeno ka caravan chale,
Mere seene pe tera sar rakhe tu aur meethi si koi boli ho,
Bin bole hi jaise mere dil se tu boli ho,
"Utna pyar karenge jitna ye aasman faila hai,
Nahi todenge kabhi apna ye jo silsila hai,
Saare jahan se chupakar bas hum tumhe pyaar karenge,
Teri ek hasi pe apni saari khushi waar denge.."

Luv, Aslam (:
Dated 10/04/2012

Khamoshi..

Aaj fir yun hua ki main zindagi se ulajh pada hu,

Khamosh in rahon par tanha sa khada hu,

Mujhe na koi ehsaas hai kisi gham ka,

Na khushi mere koi kaam aa rahi hai,

Main dhundta jata hu us anjaam ko,

Par kahin se na koi sada aa rahi hai,

Jab bhi main bolu tab bolte hai ye pal,

Ki mujhe kyun ye tanhai sata rahi hai,

Duniya ki bheed me ye shor bhi chup hai,

Main kahu to bhi kya nasamjhi ki baatein,

Bolti ye meri dhadkan tumhe bula rahi hai,

Padh sako to ye meri aankhen padho,

Jo ek guzre hue waqt me kho jati hai,

Baithe baithe yaadon me gum rehte hai,

Ek dastan zindagi bayan kar jati hai,

Mere hone par kyun sawaal uthte hai,

Mere wajood ko benaqaab kar jati hai,

Kyun ye zindagi mujhe jeene nahi deti,

Kyun mere khwabon ko andekha kar jati hai,

Barsaaton me bhi main pyaasa sa khada hu,
Aaj fir yun hua ki main zindagi se ulajh pada hu..

Luv, Aslam (: